Ourense, 25/05/2016.- Promover un envellecemento activo e saudable, fomentar a autonomía personal, prevención de situacións de fraxilidade, retrasar a dependencia e poñer en valor o papel que xogan na sociedade os nosos maiores. Con estes obxectivos abriu as súas portas a décima edición de Galisenior. Na xornada de hoxe o salón xa recibiu a visita de centos de maiores de toda Galicia que participaron activamente nos diferentes obradoiros que promoven actividades para vivir máis e mellor.
A 10ª edición de Galisenior, unha cita única no noroeste peninsular, contou coa presenza do Director Xeral do IMSERSO, César Antón Beltrán, que durante a súa intervención destacou que “un dos aspectos máis importantes do envellecemento é a participación e a involucración dos nosos maiores en todos os ámbitos da nosa sociedade, xa qué é unha conquista de toda a sociedade española ter aumentado tan notablemente a esperanza de vida”. Tamén remarcou a necesidade de que todas as administracións se adapten aos cambios poboacionais facilitando así o fomento de novas redes de protección para as familias con persoas dependentes.
Neste acto estivo acompañado pola Delegada Territorial da Xunta en Ourense, Marisol Díaz Mouteira, o Alcalde do Concello de Ourense, Jesús Vázquez Abad, o Vicepresidente da Deputación de Ourense, Rosendo Fernández, o presidente do Comité asesor de Galisenior 2016 e Coordinador das Aulas de Maiores do Campus de Ourense da Universidade de Vigo, Alberto Vaquero, así como outras autoridades locais e membros do comité asesor de Galisenior.
De carácter bienal, Galisenior é a única feira destas características que se celebra no noroeste peninsular e que está especialmente dirixida a un núcleo de poboación que representa o 24% da demografía galega e o 31% no caso da provincia de Ourense. Este salón sirve de plataforma para promover as accións que se están a levar a cabo en Galicia, destinadas a reducir o impacto da dependencia na calidade de vida, tanto de quen a padece como do que exerce de coidador.
XORNADAS TÉCNICAS PROFESIONAIS
A primeira sesión das xornadas técnicas debatiu sobre a prevención de situacións de fraxilidade, panel no que interviñeron o Colexio Oficial de Traballo Social de Galicia, a Federación de Alzheimer de Galicia e a Cruz Vermella de Ourense, que presentou exemplos de actuación.
Na xornada de hoxe tamén se falou da promoción da autonomía baseada nas novas tecnoloxías e tamén se impartiron consellos nutricionais para axudar a previr a diabetes.
Xa pola tarde se presentarán diversos programas das universidades destinados a terceira idade e estudos como resultado da investigación en distintos campus de Galicia e Norte de Portugal. O enfoque práctico será aportado por un obradoiro sobre movilización de persoas con problemas neurolóxicos.
ACTIVIDADES PARA MAIORES
Entre os grupos participantes achegáronse ata Expourense a Confederación de Organizacións de Maiores de Galicia, COGAMA, así coma a Asociación de Maiores de Telefónica, e os usuarios de centros sociocomunitarios da Xunta de Galicia procedentes de Ribadavia, Xinzo de Limia, Maceda, O Carballiño ou Verín. Entre as actividades que pudieron realizar estiveron un obradoiro de risoterapia, ou unha masterclass de ximnasia e baile. Os visitantes tamén desfrutaron de exhibicións de cociña, obradoiros de estimulación cognitiva e habilidades sociais e masaxes relaxantes.
Mañá xoves 26 continuará a feira de 10.00 a 14.00 h. e de 16.00 a 19.00 h. Tanto a entrada á feira como a participación nas actividades son gratuitas.
